الثلاثاء، 23 أغسطس، 2016

كيف الرأي في من يقول كرهتوني في الزواج؟...

By 12:51 م
السلام عليكم ورحمة الله و بركاته 



لمن يقول كرهتوني في الزواج 
عندك الحق بصراحة ، كل ما يخص الزواج يكرّهك فيه ، بداية من الوصول إلى الآخر الي يناسبك ولا ينكد عليك حياتك ولا يكرّهك في معيشتك وتكون أنت وياه سمن وعسل، مش زي ما أنت شايف الحالات الي حواليك و الي هي سبب من أسباب كرهك للزواج أو خلي نقولو بصراحة أكثر ، سبب في إدعاءك لكرهك للزواج .

إلى الأعراض المصاحبة للمهرجان الي نسمو فيه عرس والتقاليد العقيمة الحمقاء و الكل لو يلقى يحصل العصاء الي استعملتها الساحرة "شن اسمها هي؟" و حولت الخضرة لعربة و الفيران لسواقين و كانت سبب في كندرة سندريلا الي طاحت منها ولو مش هي راهو العريس اللقطة ما حصلها ولا لقاها… 

لكن العصا هذه مافي منها ولو في منها كنا حنشوفو العجائب من الي حصلها ومش حيعطيها لحد إلا لما يدفع الثمن … فكرة بزنس مش عادية 

أسباب واجدة ممكن تكرهك في الزواج و عندك الحق ، ذكر كنت أو أنثى … لأن الزواج عندنا مش زواج الحقيقة … هو صفقات تجارية مش أكثر "إلا من رحم الله من الي قصصهم ما تنتشرش زي أخبار كويسة واجدة" … و كل الصفقات التجارية ينتج عنها مكاسب و أرباح … أما الصفقة متع الزواج ينتج عنها أطفال … تسميهم أرباح تسميهم مكاسب تسميهم خسائر حرب … هذا يعتمد على تربيتك أنت لهم … مهما كان المحيط متاعك، ما تقعدش ادور في سبلة تبرر بها فشل التربية بعدين لأن الي زرع حصد ... وشوف أنت شن تزرع عشان تحصد...

طيب على كل … عشان ما نطولوش عليك وانت أصلا كاره الزواج و سيرة الزواج و كل ما يجيب له من بعيد ولا قريب ، غير أنك تستأنس بالحكي عليه و الحكي فيه ذو جو سمح تطرب له الجلسة…
نقولك على الشي الي خلاني نكتب الكلام هذا؟
أنك أنت عارف كويس جدا واجد بكل أن الزواج إلحاح داخلي … 
كيف يعني إلحاح داخلي؟
يعني هو شي تطلبه النفس لعدة أسباب وأنت عارفها كويس حتى لو كنت ما تندري انك عارفها ... لكن انت عارفها...

يعني نفسك تشتاق له سواء بدافع الأبوة (يعني تبي يكون عندك أبناء) أو بدافع إشباع الشهوة و عفة النفس أو الإحتياجات النفسية و العاطفية للشعور بالسكن الى خلقه الله فينا تبي ولا ما تبي، و هذا مش غلط ولا عيب لا بالعكس … هو الصح… لأن الله هو الي دار الطريق هذه عشان نستمتعو بالحلال و نعيشو حياتنا بالحلال و نكثرو امة محمد مش بالاسم، لا بتربية كويسة مش أي كلام… 

طيب بما أنه هو إلحاح داخلي و حيلح عليك تبي ولا ما تبي ، و ممكن اليوم أنت مافي بالك حد، و بكرا مجرد إطيح و نفسيتك تنفتح بالعواطف و تقعد الشعلة تشتعل فيك ، مش حتلقى طريق لها إلا الزواج … 
يعني خلي نقولو أنك حتجيها تجيها و بإختصار … #ترومها 
ونحن نحكو على الي يقول كرهتوني في الزواج و الكلام يمشي مع أي حد في طريقه إلى الزواج أو بإذن الله ربي يرزقه من فضله و يغنيه... قول آمين ... من وسط قلبك ... ايه زي توة آمين...

طيب على إعتبار إنك ممكن يوم من الأيام ترومها و حترومها … وعارف نشوف فيك توة تقول لا ومن جواك تقول رايمها أساسا بس مافيش كيف مرات… و ترمي فيها على النصيب المسكين الي متلقي …
راجي ... استنى ...

عمرك سمعت بالتخطيط؟

أكيد سامع بالتخطيط … يعني ان في حاجة اسمها تخطيط و تجهيز و تهيئة يعني توتي روحك لحاجة ... زي توتي روحك لزردة تخططلها مع الجماعة ... ولا العيلة ... التخطيط ... تمام...

أنت عشان ما يصيرلك زي ما صار للآخرين الي كرهوك في الزواج… ادرس موضوع الزواج دراسة كويسة و أفهمه فهم كويس و شوف كل ما يتعلق به
ليش و كيف و أمتى و عليش و شنو  متع الزواج كله شوفه … أفهمه ، أصوله أسبابه درجاته مقاماته واجباته حقوقه … كل شيء حاول تفهمه ، و هنا نحكو على الزواج الحقيقي مش الزواج الصفقة الي كرهاتك فيه لا رد بالك… 
أفهم الزواج الحقيقي كيف المفروض يكون 

كيف أنت ممكن تكون أهل لهذا الزواج و كيف بأهليتك أنت للزواج كيف تقدر تختار شخص حتى هو أهل للزواج … يعني لما انت تكون خبرة  وفاهم … حتعرف كيف تختار … مش تقعد هايم على وجهك و داير الموضوع ورا ضهرك وهو يزن كيف ذبان الصيف كل يوم وانت داير روحك ، "ركز على داير روحك" مش معدل… و بعدين لما معش تتحمل  وتجيك أول فرصة اطيح طيحة اتكره الاخرين في الزواج حتى انت … 
فهمت علي ولا؟

لا … أنت المفروض تكون أعقل منهم الي كرهوك في الزواج … و تهتم بنفسك و بعقلك و بفكرك و تسعى أنك تفهم كويس عشان تعرف تقيّم و تقدّر و تختار من بتتزوج … و بالله عليك فكنا من سيرة النصيب … لأنك انت صاحب الإختيار "أنت وأنا وكلنا في المجتمع نحن أصحاب الإختيار و نحن الي نوجوهو في أنفسنا في الحاجة هذه و نفكرو بعقلية جمعية تقدر تقول عليها حاليا انها عقيمة لأنها مادية صرفة ما تفكر الا في المادة من ناحية الجمال و القوام و الفلوس و أنت اكيد فاهمشن المقصد من الكلام… والنصيب الي يحكو عليه بالطريقة الي يحكو عليه بها، ما عمري شفت حد ناض الصبح من غير ما يندري لقا روحه موافق على زواجة وما انتبه لنفسه إلا وهو عنده عرم عيال … 
كيف صار من وين جو العيال ؟ أه معليش والله هذا النصيب تكملك الامور ولا يهمك… 

لا فكنا منها الحكاية هذه و خليك منطقي و واعي و اعرف انك صاحب الإختيار في القبول أو الرفض … ما ترفض حد كويس بسبب القراية بعدين تقول لا مافي نصيب … هو في نصيب لو انت اخترت انك توافق … مثلا بس يعني … مش أكثر … و ما تعلق عليها النقطة هذه بالذات لين تبحث عن فكرة النصيب و شن معناها و تتأكد من الموضوع إختيار في أغلبه ولا لا …

و حتى الي يقول ما جاها نصيبها لأننا ماشين بفكرة الفترينة بصفة عامة اعرض و تو يخطم حد تعجبه ياخذها ، راهو المشكلة في تأخر الزواج عندنا بيدنا نحن ، ونحن الي عطلناها و نحن الي فسدناها بدليل راضيين توة البنت تمشي تتعرف و تجرب حظها هنا و هنا "يعني تتعرف على هذا تهدرز على هذا صدفة تخليها تنسجم مع حد و هكذا" لين يصدف معها حد … ومش عارف وين عدو به النصيب في الحالات الي زي هذه "يعني مادام هو نصيب ليش الحركات الي تندار من المجتمع كله عشان الزواج؟ "… و مش موافقين ان نديرو حملة جماعية نعترفو فيها بالمشكلة و نحاولو ان نوفقو بين الشباب و البنات بحيث نسهلو لهم الزواج و خاصة من لم يلتفت لهم أحد بسبب أنهم ما وقفو في الفترينة ... وعفيفات و ما لبسو الضيق ولا زوقو ولا طلعو ولا حاولو الأساليب الي واجدين يبررو فيها بأنهم نجحو في الزواج ، أيه اهو حبو بعض و تزوجو … بس مع ذلك مش عارف من الي كرهك في الزواج … مادام انت تشوف بس للي حبو بعضهم و تزوجو و ياسلام عليهم …طيب انت كرهت الزواج من وين؟
وعلى فكرة نحن "إلا من رحم الله" نديرو في كل شي وكل الأساليب عشان الزواج الا الحلول الصحيحة المنطقية الواضحة المستقيمة

ونذكرك أن الخبر الي تشوف فيه في الشوارع و الجامعات هذا سبب من أسباب تأخر الزواج لو ما تندري … مش يقولك تبي تحيره خيره؟ ايه كيف عاد و تطلع للشارع ولا الجامعة وازي و اختار لين تحتار ، ولا غلط؟ “ تخيلو ان العرض من الجنسين هذا كله مش متوفر بالطريقة هذه؟

على كل … 
أنت خليك عاقل مش زي الي كرهوك في الزواج و أفهم الزواج فهم كويس و اشتغل على روحك و طورها (إستثمر في نفسك وفي عقلك يا أخي مش خسارة راهي)  و إعرف كيف المفروض تكون مدير بيتك ، رجل كنت ولا مرا … و بالله عليك أفهم موضوع التوافق كويس … و حتى موضوع المشاركة و التعاون … لأن التعاون عمره ما يكون أن الاثنين يشدو القفة من نفس الوذن … (الي ما فهمها الجملة تقدر تجيب طنجرة كبيرة من متاع الأعراس الي تقدر تطبخ فيها واحد عمره عشر سنين … و تكون معبية شربة و ترفعها انت وصاحبك الي بيساعدك من جهة وحدة؟ أكيد فهمتني توة ..؟ ولو ما فهمتني … فهذا معناه ان التعاون لا يمكن أن الاثنين يديرو نفس الشي و يجب أن يكون لكل منهم دوره الي يقوم به عشان يدعم دور الاخر و الحياة تستمر سعيدة… ) 
بالله عليك … فكر في الموضوع من هذه الناحية … أنت ما تبي تتزوج توة باهي مش مشكلة .. لكن هذا ما يمنع انك يوما ما حترومها و حترومها… بالتالي لما #ترومها تكون واتي … تكون جاهز
و حتلاحظ ان الكل يقول لا أنا عارف  و نقدر نقيم حوش … نقولك لا … انت تتخيل أنك عارف … لأنك تحساب الحوش طيب أكلة و فتلك طاولة و درس السيارة في الجراج و جيب الخبزة معاك وانت جاي لا … أنت هكي زي الطالب الي يحساب روحه قاري و متأكد أنه بينجح … ولما خش للإمتحان … قعد يعيط يقول … من وين جبتوها الاسئلة هذه مش في المنهج … مع انها كلها في المنهج ومافي حاجة من برا المنهج بس انت الي ما كنت معدل على المنهج … و أنت فاهم كويس القصد من الكلام… 
فما تقول انا فاهم و عارف … ومن جهة أخرى 
رانا نتعاملو مع الزواج بطريقة عجيبة جدا … تخيل وكالة الفضاء ناسا … ادير إعلان تبي رائد فضاء … يجي واحد يتقدم يشوفوه يلقو شكله كويس … نصيف ساعة يلبسوه البدلة و يديرو له حفلة و يطلقوه في صاروخ و يقولو له انت توة رائد فضاء … بحبح هي و بعد اسبوع يدير لمة و يقول أنا رائد فضاء و باركولي وما تنسو تردو لي الهدية الي هديتها لكم ساعتها في مناسبتكم… شن موقفه بالله لعيك وهو معلق فوق غادي هنك بعيد بكل؟
نفس الشي نديرو فيه في الزواج … يقعد الشاب او البنت هايمين و لا هم داريين بالحياة و مسؤولياتها ولا متدربين ولا محصلين دورات حياتية طبيعية و تجارب ، و يطيحو في حب صور الفيس متع بعضهم و يعجبو ببوستات بعضهم ، و بعدين زوجونا حرام عليكم … 
بالله توة هذا مش بالزبط نفس رائد الفضاء المسكين الي لقا روحه في الفراغ غادي هنك بعيد بكل؟
وما تبيشي يكرهك في الزواج و سيرة الزواج و نكد الزواج؟
وأحسن حاجة تلقى العروس تسب في العريس النكدي و العريس يسب في العروس النكدية … متوافقين بعد هكي مافيش 

المهم … إنتبه و وتي روحك وأفهم شن معناه الزواج و ليش نتزوجو على الاقل ما تكرهش غيرك فيه حتى أنت …

وسامحني عطلت ...

شكراً
أكمل قراءة الموضوع...